У Vapna выйшаў альбом «Amal»
Постпанк-дуэт Vapna выпусціў 10 новых трэкаў: LP атрымаў назву «Amal», якая трапна перадае яго настрой. Гэта летуценная, меладычная і вынаходлівая плытка, безумоўна, упрыгожыць лета меламана, дзе б яны не летавалі.
«Альбом спявае на мовах трывогі і расчаравання, чакання і любові, якая ўсё роўна існуе – нават калі “хлеба не будзе – будзе віно і неба”. На альбоме шмат вобразаў вады: сімвалы мора, возера, слёз, крыві і смалы пераплятаюцца, утвараючы цэласную міфалогію кахання, страты і прыроднай інтымнасці», – так апісвае рэліз лэйбл Radio Plato.
Музыкі адзначаюць, што апошнім часам «заглядзеліся на прыроду» і шмат працавалі ў музыцы з краявідамі і атмасферамі праз гітарна-барабанны гук. У параўнанні з «Аскепкамі» 2023-га «Amal» атрымаўся больш «жывым»: тут ёсць шугейзавыя сцены гуку («Тры канцы», «Скуль»), хвосткая перкусія («Ля мора», «Чорны смоўж»), прывітанні ўлюбёным краут-рок-гуртам («Возера слёз», «Рэдкі від»), але застаецца і знаёмы слухачам Vapna колд-вэйв-халадок («Палёгка»), як і летуценны інды-поп («1000 краін», «Мама казала», «Амаль»).
«Мы хацелі дасказаць недасказанае на першым альбоме. Ці атрымалася? Напэўна, амаль», – кажуць Vapna.
