Даследчык традыцыйнай музыкі Антон Анішчанка анансаваў тур
Брытанскае выданне The Quietus уключыла «Krope» Антона Анішчанкі ў спіс найлепшых альбомаў 2025-га, назваўшы плытку «надзвычайным псіхагеаграфічным падарожжам» па Беларусі. Гэтай зімой далучыцца да падарожжа можна будзе ў розных кутах Еўропы: музыка вызначыўся з адрасамі і датамі тура.
Антон Анішчанка – беларускі электраакустычны музыка, палявы гуказапісвальнік і даследчык традыцыйнай музыкі. Ён працуе на стыку гукавога мастацтва і этнаграфіі, спалучае архіўныя запісы з палявымі экспедыцыямі, аналагавым сінтэзам і жывой апрацоўкай. Раней мы пісалі пра адзін з яго праектаў – сумесны з Ганнай Сілівончык Parus. Таксама Антон – заснавальнік лэйбла «Шаткаўалка» і незалежнай творчай прасторы Accidental Point.
«Krope» – канцэптуальны альбом з шасці частак, у якім далікатныя народныя запісы з беларускіх этнаграфічных архіваў пераўтвараюцца ў жывыя гукавыя сусветы. Пабудаваны вакол песень, запісаных паміж 1960-мі і 2000-мі, альбом пераасэнсоўвае традыцыйную музыку праз сучаснае гукавое мастацтва. Песні пра каханне, выгнанне і жалобу рэзануюць праз дзесяцігоддзі: знікаючая культурная спадчына не губляе сваёй актуальнасці.
Крытыкі адзначаюць, што ў «Krope» Анішчанка пазбягае музейнай дыстанцыі і падыходзіць да архіўнага матэрыялу як да чагосьці жывога і незавершанага – галасоў, якія чуваць шмат часу пасля. Гэтая перспектыва распаўсюджваецца і на візуальную мову альбома: відэа, створанае для трэка «Pałyn», працягвае даследванне тэмы памяці і пейзажу праз тактыльныя вобразы.
Дзе будуць канцэрты:
22.01 – Młodsza Siostra, Warsaw, PL
23.01 – Kolonia Artystow, Gdańsk, PL
24.01 – My pod scena, Poznan, PL
26.01 – Hanse3, Dresden, DE
28.01 – Morphine Raum, Berlin, DE
29.01 – Cashmere radio, Berlin, DE
31.01 – Vorspiel, Berlin, DE
5.02 – Automat space, Saarbrucken, DE
6.02 – Makroskope, Mülheim an der Ruhr, DE
7.02 – NGHE, Brussels, BE
9.02 – La Régie, Montoire sur le loir, FR
10.02 – Angers, FR
22.02 – accidental point, Minsk
