Лявон Вольскі, «Вольны хор» і «Вольны аркестр» прэзентавалі кліп на песню «Зямля», якую ведаюць усе, хто знаёмы з творчасцю гурта «Мроя».

Песня была створаная гуртом «Мроя» ў 1989 годзе, яна ўвайшла ў альбом «Дваццаць восьмая зорка» (1990). Зараз суполка спевакоў «Вольны хор» вырашыла падарыць кампазіцыі новае жыццё.

Рэжысёр кліпа Андрэй Грынько распавёў пра «рэмэйк», што гэта «ўсе тыя ўспаміны, як і думкі, якія сёлета, а мабыць і заўсёды, былі блізкія да нашай зямлі, да нашага краю. Яны з’яўляюцца нібыта міражы, калі гучыць гэтая песня. Вялікая гісторыя і падзеі ператвараюцца ў звычайную стужку, на якую свеціць прамень кінапраектара. Памяць паступова знікае ў вялізарнай прасторы часу. Нічога не застанецца, ніводнага кавалка. Напэўна толькі зямля можа захаваць столькі болю, крыві, надзеі і веры. Усё знікне, а яна застанецца».

Кліп «Зямля» распачынае серыю сумесных відэаработ грамадскай кампаніі «Годна» і «Вольнага хору». У гэтай серыі культавыя беларускія трэкі і сучасныя топ-кампазіцыі прагучаць у выкананні хору з аркестрам. Анансуюць, што за «Мрояй» выдадуць новую версію музыкі Зміцера Вайцюшкевіча і гурта «Дай дарогу!».