Dlina Volny – трыа Машы Зіневіч, Вада Мікуцкага і Алеся Шышлы. Калектыў з’явіўся на музычнай мапе Беларусі ў 2016 годзе і ўжо паспеў выпусціць EP «Neizmerima» (2016) і два лонгплэі – «Mechty» (2018) і «Dazed» (2021), у тым ліку на касетах і вініле. Музыкі досыць актыўна катаюць па Старым і Новым Свеце, таму не дзіва, што іх падпісаў сур’ёзны амерыканскі лэйбл Italians Do It Better. Dlina Volny працуе ў змрочнай эстэтыцы з адсылкамі да творчасці Стывена Кінга і Дэвіда Лінча. Уласна гурт акрэслівае свой халодны, неонавы, нуарны, постпанк-сінтвэйв, тэатралізаваны стыль як «брут-поп».

Індзі-дакументалку падрыхтавалі ўдзельнікі каманды Radio Plato. Рэжысаваў кіно Паша Кірпікаў, прадзюсарам выступіў Андрэй Славінскі. Зняць відэагісторыю пра гурт іх заахвоціла даўняя зацікаўленасць у тым, што робіць Dlina Volny, любоў да іх эстэтыкі, а таксама жаданне распытаць аб тых працэсах, якія адбываюцца ў думках музыкі, але не бачныя гледачам і слухачам.

«Гэтае кіно – пра пакутлівыя пошукі завершанасці, ідэалу, свайго гучання і ўнікальнасці, сваёй аўдыторыі, а таксама пра тое, што мучыць, напэўна, усіх людзей мастацтва – сіндром самазванца і пачуццё расчаравання ў сваёй працы, – кажуць стваральнікі дока. – Шмат хто з нас мае справу з гэтымі асабістымі і творчымі выклікамі, we are not alone. Не існуе ідэальнага рэцэпта або канчатковага рашэння ўласных праблем, з якімі мы сутыкаемся ў жыцці. Але, у рэшце рэшт, слуханне адно аднаго можа дапамагчы нам знайсці выхад з няўпэўненасці, сумневаў і цемры».