8 траўня 2018 года ў самым буйным менскім клубе Prime Hall гурт «Дай Дарогу!» адначыць сваё дваццацігоддзе. Абяцаюць выбухное шоу і сакрэтных гасцей.

«Не ўсе людзі дажываюць да 20 гадоў, а мы ўсё яшчэ на плыву і грабем ў правільным кірунку!» — кажа лідар гурта Юрый Стыльскі. Канцэрт адбудзецца 8 траўня. Менавіта ў гэты дзень «Дай Дарогу!» традыцыйна радавалі менчукоў сваім вясновым выступленнем у самым родным для гурта и яго фанаў клубе «Re: Public». Стыльскі патлумачыў змену пляцоўкі: «Нам 20, і нас стала настолькі шмат, што прыспеў час пашыраць далягляды і спрабаваць для сябе нешта новае. Трэба праверыць, наколькі мы сапраўды моцныя».

Гурт «Дай Дарогу!» быў заснаваны ў Берасці ў траўні 1998 года. На яго рахунку сем арыгінальных студыйных альбомаў, два акустычныя і адзін зборнік лепшых хітоў. Апошнія паўтара года музыкі прысвяцілі маштабнаму туру «СацПакет», куды ўвайшлі самыя вострасацыяльныя хіты з усіх альбомаў. З гэтай праграмай гурт аб'ездзіў Беларусь, Украіну і Расію, зазірнуў ў Польшчу і Чэхію.

У Prime Hall вясной нас чакае цалкам новую праграму. Абяцаюць усё тыя ж угарныя, правераныя часам баевікі, а таксама зусім новыя песні, якія рыхтуюцца для будучага альбома. Гурт разлічвае здзівіць усіх і незвычайным гукам. «120 дэцыбел беларускага панка на 80 кілаватах крутога амерыканскага гуку!» — жартуюць музыкі, да якіх на менскім канцэрце для ўзмацнення далучыцца яшчэ адзін гітарыст.

Квіткі ўжо ў продажы. Кошт – ад 15 BYN у афлайнах і ад 18 BYN у анлайн-аператараў Ticketpro і Kvitki.

Кампанію на канцэрт шукай на афіцыйнай старонцы юбілейнага канцэрта ў Prime Hall.