Як прывезці замежных сяброў у Беларусь?

  Кароткачасовая віза С у Беларусь афармляецца на 30 дзён. Мэта візы ў дадзеным выпадку – прыватная. Каб атрымаць яе, тваім сябрам неабходна звярнуцца ў консульства ці пасольства Беларусі ў краіне, дзе яны знаходзяцца, і падрыхтаваць наступныя дакументы:

- пашпарт;
- візавую анкету;
- фота;
- дакументы візавай падтрымкі, напрыклад запрашэнне ці заяву ад цябе;
- страхоўку;
- квітанцыю пра аплату консульскага збору.

  Папярэдзь сяброў, што ў консульстве могуць запатрабаваць і іншыя дакументы.

  Калі твой сябар(-оўка) з краіны Еўразвязу не плануе гасціць у Беларусі больш за 30 дзён, запрашэнне рабіць не абавязкова.

  Для віз на 90 дзён, а таксама для віз грамадзянам «нядобранадзейных краінаў» (патэнцыйных крыніц нелегальнай міграцыі) трэба абавязкова падрыхтаваць запрашэнне, аформленае аддзелам па грамадзянстве і міграцыі Міністэрства ўнутраных спраў. Спіс аддзелаў па Менску і кантакты шукай на сайце.

  Каб зрабіць такое запрашэнне, табе давядзецца запоўніць заяву-анкету. Загадзя даведайся ў сяброў прозвішча, імя, год і месца нараджэння, грамадзянства, нумар нацыянальнага пашпарта, адрас, месца працы і пасаду.

  Калі твой сябра з «нядобранадзейнай краіны», табе давядзецца падрыхтаваць яшчэ і дакумент, які пацвердзіць наяўнасць сродкаў на ўвесь час знаходжання замежніка тут. Дарэчы, «чорны спіс» такіх краінаў – не публічны, таму пра адпаведны статус твайго госця табе можа паведаміць толькі непасрэдна супрацоўнік аддзела па міграцыі.

  За афармленне запрашэння трэба заплаціць адну-паўтары базавых у залежнасці ад хуткасці (ад 5 да 10 дзён).

  Звярні ўвагу, што консульства запатрабуе арыгінал, таму давядзецца запарыцца з паштовай перасылкай.

  Для большасці краін свету кароткачасовая віза С каштуе € 50-60, для грамадзян Літвы, Латвіі, Польшчы і Эстоніі – € 25, для ўладальнікаў амерыканскага пашпарта – $ 75. Усе стаўкі глядзі тут або на афіцыйных старонках беларускіх консульстваў у адпаведных краінах.

  Тэрміновае афармленне візы цягам двух дзён звычайна падвышае тарыф у два разы.

  Не забудзь нагадаць замежным сябрам пра міграцыйную карту, якую ім павінны выдаць сцюард(-эса), праваднік(-ца) ці кіроўца аўтобуса. Можаш загадзя растлумачыць ім незразумелыя пункты – як вядома, беларускія памежнікі не валодаюць замежнымі мовамі.

  Міграцыйную карту неабходна захоўваць да канца паездкі і здаць памежнікам на выездзе.

  Таксама памежнікі могуць запатрабаваць страхоўку і спраўдзіць наяўнасць грашовых сродкаў – не менш за дзве базавых велічыні на кожны дзень (каля € 20).

  Калі твой госць завітаў больш чым на пяць дзён, давядзецца прайсці яшчэ адну працэдуру – рэгістрацыю ў органах Міністэрства ўнутраных спраў. Дарэчы, нядзеля і святочныя дні не ўваходзяць у гэтыя пяць дзён.

  Для рэгістрацыі табе трэба запоўніць яшчэ адну заяву і аплаціць палову базавай велічыні. Пры сабе замежніку(-цы) трэба мець міграцыйную карту, пашпарт і страхоўку. Штамп пра рэгістрацыю ставіцца ў міграцыйную карту.

Афармленне віз замежнікам для наведвання Беларусі

Скінь замежным сябрам гайд па Менску, а для сумесных паездак па рэгіёнах глядзі нашыя гайды ў «Правінцыі».