Прэзентацыя сінгла: Мутнаевока – Сады
Пасля трыумфальнага максі-сінгла «Голыя танцы», які атрымаў «Сінгл года» на ўзнагародах Еўрарадыё «Даём рады 2016», менскі гурт «Мутнаевока» вяртаецца з новай песняй і аб’яўляе дату выхаду новага альбома. Сустракаем «Сады» – узрушальны рамантычны падарунак для ўсіх, хто ўжо ў трапяткім прадчуванні вясны.
Вакаліст гурта Яўген Змушка
пакінуў нам два аркушы, на якіх у кранальнай форме ліста распавёў пра новую песню.
– Мне хочацца ўзяць цябе за руку, каб адвесці ў запаветныя сэрцу мясціны, дзе няма ані ўчора, ні заўтра… Вырвацца з кантэксту, стаць па-за часам, знайсці рай на зямной прасторы і зберагчы яго ўдваіх. Паверыць, што ўсё магчыма, бо ўсе немагчымасці – гэта толькі нашыя страхі. А страхі бяссільныя перад чысцінёю мыслі і першараднай прыгажосцю, якую дару табе… Так шмат мітусні і няпраўды ў гэтай штодзённасці… Не бойся – паляцелі са мной.
Песня «Сады» – адна з дзесяці трэкаў новага, трэцяга лонгплэя гурта – адабраная ў якасці сінгла перад выданнем і прэзентацыяй новага альбома. Можа, яна не лепшым чынам люструе агульны сэнс плыткі, але гучыць досыць дынамічна, лёгка і караценька, не раскрываючы ўсе карты, што музыкі падрыхтавалі (назапасілі) для сваіх слухачоў. Такім чынам, першы падарунак для ўсіх, хто ў прадчуванні вясны!
Новы альбом «Мутнаевока» будзе называцца «Метро» і пабачыць свет 20 сакавіка на «Першаку». Лайв-прэзентацыя запланаваная ў траўні. Сачы за абвесткамі!
«Мутнаевока» ў сеціве:
VK Facebook Soundcloud Spotify «Yandex Музыка» Apple Music
DOWNLOAD 6 МБ
