POLYN выпусцілі сінгл «Ранак» і анансавалі канцэрты
Супергурт POLYN выдаў трэк «Ранак» – адразу з кліпам.
Фірмовая горкая іронія ў лірыцы «палынцаў» саступіла месца светлай тузе – то па дзяцінстве, то па недасягальным месцы, дзе ўсе шчаслівыя. Тэкст да сінгла напісаў Сяргей Краўчанка, над музыкай працавалі Аляксей Ванчук, Ілля Церашчук, Сяргей Краўчанка і Ілля Чарапко-Самахвалаў.
Відэа да «Ранка», выкананае ў тэхніцы стоп-моушн, аб’ядноўвае архіўныя фотаздымкі, дзіцячыя малюнкі і пранізлівыя пейзажы, надаючы кампазіцыі дадатковую, амаль невыказную словамі глыбіню. Візуалізацыю стварыла мастачка Маргарыта Ціхановіч.
Неўзабаве аматары гурта могуць чакаць альбом – частка матэрыялу ўжо гатовая. Напрыканцы траўня POLYN можна будзе паслухаць нажыва ў Вільні (28-га, Paviljonas) і ў Варшаве (29-га, Klub Mechanik). Квіткі – па спасылцы.
