Drum Warz x JJ.OK выпусцілі дарк-джаз-трып-хоп плытку
На лэйбле Radio Plato выйшла цікавая навінка ад Drum Warz x JJ.OK.
«Fragments» – гэта змрочны, нуарны альбом, у якім спалучаюцца сэмплаваныя дарк-джазавыя кампазіцыі, цяжкі гітарны гук і брудныя олдскульныя барабаны. Рэліз спалучае ў сабе элементы хіп-хопа, трып-хопа і, месцамі, гітарнага эмбіента.
«Праца над альбомам пачалася яшчэ на пачатку восені 2023 года, – распавядаюць музыкі. – За гэты час змянілася некалькі ідэй і канцэпцый. На гэтым рэлізе Drum Warz адышоў ад класічнага boom bap прадакшэна, дзякуючы гітары, якая дадала змрочнага і цягучага гучання».
Drum Warz – беларускі музыка і бітмэйкер. Робіць інструментальны хіп-хоп старой школы, у аснове бітоў якога кладуцца джазавыя, фанкавыя і нават металёвыя кампазіцыі з персанальнай калекцыі. Мае некалькі альбомаў і EP. Раней удзельнічаў у берасцейска-менскай кааліцыі бітмэйкераў Podpolie 162.
JJ.OK – беларускі музыка і гітарыст. З дапамогай гітары, дрона і шумавых эфектаў стварае вязкія, насычаныя палотны ў разнастайных жанрах – ад эмбіента і дрона да эксперыментальнага пост-рока і поп-электронікі. З'яўляецца часткай гуртоў The Glitchhh, Electric Poets і DAH.
