«Dance On My Own» – песня пра барацьбу з навязанымі вобразамі і абмежаваннямі, пра прыняцце свайго дзівацтва, іншасці і ўнікальнага шляху, які робіць цябе шчаслівай(-ым).

За звядзенне і майстарынг гуку гэтым разам адказваў саўнд-прадзюсар Insomnia, а ў здымках брала ўдзел рэжысёрка Дар'я Загорская з Sony Music і спецыялісты(-кі) па візуальных эфектах, якія працавалі з The Weekend. Відэа стварылі разам з тэлеграм-каналам «КЛІК», кліпам Анастасіі Рыдлеўскай каманда стартавала ютуб-канал. 

Анастасія Рыдлеўская:

– Гэта пра здаровую агрэсію да соцыуму, які на цябе ціснуў, і пра выхад гэтай энэргіі. Пра вызваленне ўсіх сваіх складаных станаў, якія не робяць цябе дрэнным чалавекам, а робяць глыбокім, дзіўным, незвычайным. Магчыма, з-за гэтага цябе нават не прымаюць, але ты менавіта таму ўнікальны, і саромецца гэтага не трэба. Я супер-інтраверт і мала стасуюся з людзьмі. Вывучаю сябе як аб'ект і стараюся творчасць будаваць такім чынам, каб гэта была мая мова камунікацыі з вонкавым светам. Праз маю асабістую прызму перадаецца ўніверсальны стан чалавека. Калі ты прыйшоў да мяне на выставу, паслухаў маю песню і нешта адчуў – клас, таму што я менавіта гэта і хацела зрабіць, я хацела з табой так пагаварыць.

Фота: КЛІК