Molchat Doma прэзентавалі лайв-запіс на фоне гатэлю з вокладкі альбома
Постпанкі Molchat Doma запісалі тры трэкі лайвам і прэзентавалі іх на фоне гатэля Panorama, выява якога ўпрыгожыла вокладку альбома «Этажи» 2018 года.
Прэзентацыя «Live at Panorama Hotel» была адкладзеная праз разбуральныя і трагічныя пажары ў Лос-Анджэлесе, але 15 студзеня фаны гурта, якія намагаліся адгадаць, што трапіць у трэк-ліст лайву, нарэшце пабачылі, як добра вядомая ім выява ажыла ў снежнай пахмурнасці.
«Live at Panorama Hotel» аб’яднаў трэкі з «Этажей» – «Toska» і «Sudno» (куды ж без яго!) – а таксама кампазіцыю з новага альбома – рамантычна-містычную «Сhornye Cvety». Паслухаць можна на стрымінгах, паглядзець – на YouTube.
Гатэль Panorama знаходзіцца ў Высокіх Татрах ў Славакіі, на курорце Штрбске Плеса. Ён пабудаваны па праекце архітэктара Здэнека Ржыгака ў канцы 1960-х. Гэта выдатны ўзор бруталісцкай гатэльнай архітэктуры тых часоў, побач з якой музыка Molchat Doma атрымлівае дадатковы аб’ём.
