1577 0

Аляксандр Шышко

Малады і актыўны бізнэсоўца з Горадні Аляксандр Шышко расказаў агенту 34mag пра стварэнне і развіццё праекту квэст-руму ZASADA, цяжкасці бізнэсу і матывацыю рабіць культурнае жыццё роднага гораду больш якасным і разнастайным.

 

Чым займаюцца: cтварэннем альтэрнатыўнага віду адпачынку.

Дата заснавання: кастрычнік 2015 года.

Структура: 3 чалавекі.


Кантакты:

VK  |  Сайт
 


З кім гутарым: Аляксандр Шышко, 26 гадоў, фінансіст паводле адукацыі. Арганізоўвае вечарыны ды імпрэзы.

 

 

Гісторыя Аляксандра

– Мне 26 гадоў, нарадзіўся я ў Горадні. Цяпер займаюся арганізацыяй розных імпрэзаў: ад карпаратываў да ўсялякіх рэкламных кампаніяў. Працую ў гэтай сферы ўжо каля пяці гадоў.

Я скончыў Гарадзенскі дзяржаўны ўніверсітэт імя Янкі Купалы па спецыяльнасці «Фінансы і крэдыт». Паводле адукацыі я фінансіст, але ў прафесіі ніколі не працаваў. Мяне зусім не цікавяць сухія лічбы. Яшчэ падчас навучання заўважыў у сябе здольнасць да арганізатарства, але займацца мерапрыемствамі сур’ёзна пачаў толькі пасля ўніверсітэту.

Тады паўстала пытанне: працаваць па найме або на сябе. Выбраць было вельмі цяжка, першыя два гады прайшлі няпроста, сёння ўжо крыху лепей. Але ж, усё роўна, час цяпер напружаны, асабліва ў маёй сферы.

«Нашая каманда мала думала і шмат рабіла»

Што датычыць нашага праекту ZASADA, то ідэя стварыць такую штуку прыйшла выпадкова. Аднойчы я трапіў у адзін квэст-рум у Менску, пагуляў, і мне спадабалася. Вельмі спадабалася. Захацелася зрабіць нешта падобнае ў Горадні. Усё ж такі квэст – гэта таксама мерапрыемства, хай і маленькае, хай і даўжынёй гадзіну.

Гэтак, ідэю я прынёс дадому, сабраў каманду аднадумцаў і мы пачалі.

 

 

Як зрабіць ZASADу

– Ад з’яўлення ідэі зрабіць квэст-рум да яго адкрыцця прайшло дзесьці два-тры месяцы. Нашая каманда мала думала і шмат рабіла. Мне блізкая такая пазіцыя, насамрэч: трэба варушыцца, а не сядзець. Так мы пахадзілі па розных квэстах, зразумелі сэнс гэтай штукі, распрацавалі самастойна сцэнар і тэрмінова пачалі шукаць памяшканне. Рабілі ўсё самі: як бачылі будучы квэст-рум, гэтак збольшага і атрымалася.

Для Горадні ZASADA – з’ява даволі новая. Мы былі толькі другімі з ліку, хто пачаў рабіць такія штукі тут. Па сутнасці, наш квэст-рум – гэта памяшканне, дзе зададзены пэўны сцэнар, паводле якога ўсё будуецца вакол прынцыпу «выйсці з пакою».

Гэтак, цяпер мы маем два квэсты: «Ідэальнае выкрыццё» і «Адрэналін». Яны адрозніваюцца адзін ад аднаго як паводле ідэі, гэтак і паводле напаўнення, але ж абодва вельмі тэхналагічныя, над імі працаваў добры адмысловец, таму шмат чаго непрадказальнага і незвычайнага сустракаецца для гасцей.

«Мы хочам паказаць людзям, што ёсць альтэрнатыва барам і клубам»

«Ідэальнае выкрыццё» − гэта гісторыя пра тое, як адмысловыя агенты пранікаюць у дом галавы дабрачыннага фонду, які пад прыкрыццём карысных справаў крадзе грошы. Вось іх і трэба забраць, а таксама раскрыць злачынства. За час гульні наведнікі пераадольваюць розныя сістэмы бяспекі, разгадваюць лагічныя загадкі. Мы стараліся не «мудрыць», бо разумелі, што калі зрабіць якую-небудзь вельмі складаную гульню, то людзям не будзе гэта цікава.

Насамрэч, шмат людзей больш любяць здагадвацца, чымся думаць. Гэта нам падказаў другі квэст, у якім дзе-нідзе трэба напружваць мозг.

Людзі часам лічаць, што нецікава губляць на разгадку 5–7 хвілінаў.

 

 

Пра мэты і жаданні

– Хлопцы, якія трымаюць квэст-румы ў Менску і якія гулялі ў нас, кажуць, што наш праект не горшы за сталічныя. Але Горадня – горад даволі павольны, усе новыя ідэі, квэст-рум у тым ліку, прыжываюцца марудна.

Дзеля таго, каб у ZASADA хадзілі натоўпы, трэба, каб прайшоў пэўны час і адкрылася шмат іншых якасных квэстаў, каб было з чым параўнаць. На гэты момант у Горадні ёсць добрыя квэст-румы і, скажам, не зусім. І тыя, што менш якасныя, захопліваюць рынак. Людзі прыходзяць туды, іхнае першае ўражанне не самае лепшае. А яно, вядома, моцнае. Так гэты квэст, а разам з ім і астатнія страчваюць кліентаў.

Я лічу, што гэтую праблему вырашыць час: кліент заўсёды сам расставіць усё на свае месцы. Нам проста патрэбныя добрыя гульцы на рынку, нас выратуюць цікавыя квэсты-канкурэнты, якія будуць з’яўляцца побач.

«Насамрэч, шмат людзей больш любяць здагадвацца, чымся думаць»

На жаль, у горадзе зусім няма якаснай інфраструктуры забаваў і адпачынку. Свой вольны час людзі праводзяць даволі банальна: кіно, бар ці клуб. Я не ведаю, чаму так склалася, мабыць, калі б ведаў, мог бы штосьці змяніць ужо даўно.

Мы заўсёды намагаемся стаць лепей. Увесь час запрашаем кліентаў, падглядаем, што адбываецца ў Менску, Маскве, Пецярбургу, спрабуем скарыстаць досвед іншых. Нам цікава ўсё новае і класнае, што магчыма зрабіць у горадзе.

Нетрывіяльны адпачынак – гэта галоўная мэта, якую мы ставім перад сабою. Хочацца паказаць людзям, што ёсць альтэрнатыва барам і клубам. Калі мы толькі пачалі працаваць, то думалі, да нас будуць прыходзіць «тусоўшчыкі», але выйшла інакш. Нашыя кліенты – людзі ад 25 да 30 гадоў, працаўнікі офісаў, сем’і ды маладыя пары.

Можна сказаць, мы дапамагаем нараджацца класным штукам. Дзесьці месяц таму хлопец зрабіў сваёй каханай прапанову ажаніцца. Пад гукі сірэнаў і сігналізацыяў, у запале гульні ён прысеў на калена і дастаў з кішэні кальцо. У дзяўчыны былі фантастычныя эмоцыі. І гэта крута. Дзеля гэтага мы працуем.

 

 

Тэкст by Сцяпан Балашоў
Фота by Leah Skuridina


ВЫШЭЙ
ЗГАРНУЦЬ КАМЕНТАРЫ

Пакуль няма ніводнага каментара

Напісаць каментар

альбо аўтарызацыя
Неадэкватныя па меркаванні рэдакцыі каментары могуць быць выдаленыя.