Пра новую беларускую драматургію кажуць часта і з задавальненнем: рабіліся круглыя сталы, дыскусіі, чыткі, ёсць цэлыя даследаванні і абароненыя дысертацыі. Ставяць не так ахвотна і ўсё больш у Расіі, але кропля точыць камень. Найлепшым спектаклем пазамінулага года крытыкі і журналісты назвалі вербатым «Мабыць» у Рэспубліканскім тэатры беларускай драматургіі, на «Опіум» пра вайну ва Украіне гледачы сабралі грошы праз краўдфандынг, а ў чэрвені ўпершыню прайшоў беларускі фестываль драматургіі «Writebox». Трымай пяць новых цікавых п’есаў – асалоду для мазгоў і сэрца, – якія можна пачытаць, пакуль іх яшчэ не паставілі.
#Сцешык #Ларына #рэальнасць #казка
Канстанцін Сцешык напісаў гэты тэкст у межах лабараторыі Цэнтру беларускай драматургіі (ЦБД), і ўжо гэта цікава, бо драматург вядомы сваім скепсісам у дачыненні да беларускага тэатральнага працэсу. Ягоныя спектаклі ў Свабодным тэатры можна ўжо смела называць вехамі для беларускага тэатральнага андэграўнду пачатку стагоддзя, а самы свежы прыклад: у супрацы з ім рыхтаваўся тэкст вербаціму для выпускнога праекту тэатральнай канцэнтрацыі ECLAB.
Фішка «Запалак» у тым, што гэта якраз рэпертуарны тэкст, які можна і трэба браць і ставіць на вялікай сцэне з добрымі артыстамі. У ім ёсць усё, чаго нам так не стае, − сімпатычны герой, загадка, тэма смутку і тэма клопату. Бацька расказвае свайму дзіцяці на ноч казкі (гэта выглядае такімі інтэрмедыямі), пакуль, па хадзе дзеяння, ён сам спрабуе разабрацца ў сваім жыцці ды са сваёй смерцю, у якой за бачнаю нармальнасцю схаваны вывіх рэальнасці.
Калі нарэшце?
Маладая рэжысёрка Таццяна Ларына пасля вучобы ў Маскве шукала матэрыял для рэалізацыі ў Беларусі. Яна зрабіла рэжысёрскі эскіз гэтай п’есы ў Купалаўскім, ён спадабаўся ўсім, і кіраўніцтва пагадзілася ставіць п’есу. Дакладнай даты няма, дамоўленасці непадпісаныя, на гэтым этапе – сплюнем і пастукаем.
#Трылер #Карняг #багаслаўскі
Гэты тэкст таксама з лабараторыі 2015 года. Вялікім сюрпрызам быў удзел у п’есе рэжысёра Яўгена Карняга, які дагэтуль яшчэ не працаваў з беларускаю драматургіяй. У супрацы з ім Дзмітрый Багаслаўскі стварыў свой самы скандальны тэкст.
Чацвёра дзяўчат зачыненыя ў прасторы 1,5х1,5х1,5 м. Целы і месца зададзеныя, гэта і ёсць гісторыя. Перш за ўсё, раскрываецца тэма канфлікту з жыццём, з сабой, са сваёй цялеснасцю. Пра гэта ўласна ўсе спектаклі Карняга, ды і п'еса напісаная так, што ў ёй нават адгадваюцца канкрэтныя выканаўцы роляў.
Але змест адкрывае цэлы космас для магчымых трактовак. Твор названы гэтаксама, як атручаная сабака Гітлера, у якой было чатыры шчанюка, пры гэтым у п’есе гучыць песня аднайменнага гурта «Die young, stay pretty».
Ну і калі нарэшце?
У межах моладзевага тэатральнага форуму краінаў СНД гэты тэкст, у якасці навучальнага, зрабілі, здаецца, усе. Асабліва ўразіў эскіз самага моднага маладога рэжысёра постсавецкай прасторы Владаса Барэйкіса, які ў той час чакаў прапаноў для пастаноўкі. Але калі яны і будуць, то не ў Беларусі, бо абсалютна лагічна, што ў нас гэты твор мусіць паставіць Яўген Карняг. Сам Дзмітрый Багаслаўскі, ва ўсялякім разе, адназначна пацвярджае права першай пастаноўкі за Карняг-тэатрам. Калі яна ўсё ж такі мае адбыцца – невядома. І менавіта цяпер, падобна да таго, што пакуль немагчыма.
#Дасько #Шчэрбань #СТ #Кунцаўшчына #сторытелінг
Максім Дасько з новенькіх, але ўжо паспяховы настолькі, што заслугоўвае, каб яго не параўноўвалі з кім бы там ні было. Напрыклад, у межах конкурсу «Writebox» ва ўмоўны шорт-ліст увайшлі ажно два ягоныя тэксты, і абедзве чыткі п’есы выклікалі шырокі рэзананс. Але менавіта на прыкладзе «Оніксу» хочацца ўсё ж такі сказаць пра традыцыю, якую пачаў у Беларусі Павел Пражко, а менавіта скрупулёзную ўвагу да маўлення герояў, пагарду да тэатральнасці формы, цікавасць да гарадскіх ускраінаў. Пражко даўно піша зусім у іншым ключы, а Дасько працягвае распрацоўваць гэтую тэму, і яна здаецца невычэрпная.
У «Оніксе» ад першай асобы начытваюць гісторыі цяжкага жыцця падлеткаў Кунцаўшчыны пад завадныя рытмы адных з самых вядомых рэпераў east-coast. Гангста-стайл амерыканцаў адбіваецца на жыцці менскага панэльнага гета, часам камічна, часам трагічна.
Ну і калі?
Уладзімір Шчэрбань, рэжысёр «Свабоднага тэатру», сказаў, што прэм’еру «Оніксу» можна чакаць ужо ўвосень. І гэта вельмі цікава.
П’еса Дасько «Лондан» пасля прэм’еры ў «Свабодным тэатры» была пастаўленая Бабруйскім імя Дуніна-Марцінкевіча – і гэта настолькі неверагоднае спалучэнне, што нельга ўтрымацца згадаць гэты факт. З намёкам, што і «Онікс» цікава было б убачыць, скажам, у Слоніме або Маладзечне.
#Каралёў #масква #эмігранты
Яшчэ адзін цудоўны дэбютант беларускай драматургіі – Віталь Каралёў. Ягоную п’есу «Участковыя» паспелі сыграць у Музеі МУС і на прыватнай кватэры, ягоны «Опіум» сабраў дзве з паловаю тысячы долараў на Ulej. Нядрэнна для рэзюмэ драматурга, які пачаў пісаць гады два таму.
«Масква тэатральная» − не самая свежая п’еса са спісу, напісаная ў драматургічнай лабараторыі ЦБД яшчэ ў снежні 2014 года. Першае, што ў ёй кідаецца ў вочы, – гэта фармальны прыём (аповед пра сустрэчу аўтара з маскоўскаю міліцыяй са шчаслівым канцом, але падзеі размешчаныя з канца да пачатку). Раптам звяртаеш увагу, што ўвогуле гісторыя пра беларуса ў Маскве ў нас па-мастацку не засвоеная. Гэта азначае, што тэма існуе на ўзроўні бульбасрачу, беларусаў у Залатагаловай вельмі шмат, а вось тэма працоўнай міграцыі ў тэатры, калі і гучала, то на прыкладзе ірландцаў Макдонаха, якія працуюць у Лондане. У простай замалёўцы Каралёва ёсць тое, што спрабуюць ухапіць ў гэтай тэме, – разгубленасць ад збою сістэмы свой-чужы.
Калі нарэшце?
Рэжысёрка Вольга Саратокіна, з якою Каралёў пісаў п’есу ў драматургічнай лабараторыі ЦБД, выказала цікавасць да пастаноўкі пра Маскву, але чамусьці менавіта «Масква тэатральная» яе не зацікавіла.. І ў гэтым спісе п'еса прысутнічае проста таму, што паставіць яе прасцей паранай рэпы і нават танней за яе.
#Чыканас #крылыхалопа #брэст
Лёха Чыканас напісаў злы і надзённы тэкст, які выклікаў вялікую цікавасць на фестывалі «Writebox».
У п’есе апавядаецца гісторыя пра сядзелку, якая займалася сэксам са сваім падапечным, чалавекам з абмежаванымі магчымасцямі. У драматурга не проста атрымліваецца ёміста, у форме суда над гэтаю самаю сядзелкай, пераказаць гісторыю, але і даць эффект dolby suuround усяго суправаджальнага медыйнага шуму. У выніку п’еса атрымалася пра тое, як мы кормім троляў.
Калі?
Аўтар узяў ініцыятыву ў свае рукі. Разам са сваймі калегамі з берасцейскага тэатру «Крылы халопа» арганізоўвае чытку на сваёй малой радзіме. Ёсць добры шанец, што яна стане рэгулярная і з яе атрымаецца паўнавартасны спектакль. Таксама пару дзён таму прэзентацыя п'есы прайшла ў Інтэрнаце №3.
11 кастрычніка ў «Пункце» пройдзе public talk з галоўным рэдактарам украінскага выдання Platfor.ma.
Украинский рэп, британский панк, немецкая электроника – скорее хватай квиток.
Шыфраванне, збег пароляў і бяспека гаджэтаў – як ніколі актуальна.
Коллаб мечты грустного миллениала.
A story about (or no) cooperation between government representatives, NGOs and ordinary people that care.
A story about (or no) cooperation between government representatives, NGOs and ordinary people that care.
Javid Nabiyev speaks on arrests of gay people in Azerbaijan, explains the «fucking solidarity» term and the point of activism.
Joris Hanse, Dutch activist from the Doorbraak, speaks about the Netherlands not matching the stereotypes.