З траўня па верасень на нашую просьбу пісьменнік Альгерд Бахарэвіч штотыднёва і пунктуальна ствараў для сучаснікаў і нашчадкаў жыццяпіс менскага лета ўзору 2016-га. Сёння друкуем на 34mag фінальную частку рубрыкі «Таемны госць» – пра словы, падман і нават трохі пра лідагенерацыю. І канчаткова – ўэлкам ту восень!
Іду я ўчора па вуліцы Куйбышава. Дыхаю восенню.
А мне насустрач, проста ў лоб, вялізная такая білбордзіна на высокіх жардзінах.
На ёй твар хлопчыка гадоў дваццаці і тэкст: «Даниил Гридин – эксперт №1 в теме лидогенерации для b2b по словам Игоря Манна».
І так мне хораша зрабілася на душы ад гэтых простых словаў, што хоць плач. Захацелася перачытаць «Смерць у Венецыі» ці кінуцца ў Свіслач. Але ясныя, маладыя і абсалютна лідагенератыўныя вочы Данііла Грыдзіна мяне супакоілі.
Усё ж такі малайчына гэты Ігар Ман, падумаў я. Сур’ёзны, відаць, мужык, абы за што не пахваліць. І наогул: нарэшце хоць нехта заняўся лідагенерацыяй у нашым халодным горадзе, дзе з b2b заўжды былі такія праблемы…
«Нарэшце хоць нехта заняўся лідагенерацыяй у нашым халодным горадзе, дзе з b2b заўжды былі такія праблемы»
І мне міжволі прыгадаўся травень.
У траўні я ведаць не ведаў, што такое «стартап», «каворкінг», «барбер» і «мурал». Я блытаў даўншыфцінг і краўдфандынг. Слова «клінер» выклікала ў мяне пошлую ўсмешку. А цяпер я ведаю, нікога не саромеюся і нічога не баюся. Калі б Ігар Ман прачытаў гэта, ён бы мяне, напэўна, таксама пахваліў. Праўда, застаюцца яшчэ «драфт», «кластар»… «Мерчандайзінг», «айдэнтыка»… «Баёпік»… Ё-маё. Магчыма, Гасподзь будзе да мяне літасцівы і мне ніколі не давядзецца вымаўляць усю гэтую маржу ды іншую франшызу, а пагатоў пісаць яе вялікімі і малымі літарамі на сваім нэтбуку.
«Не заракайся», – сказалі мне вочы Данііла Грыдзіна. Невядома, як яшчэ жыццё павернецца. Сёння ты таемны госць, а заўтра ў нечым горле косць.
Што паробіш. Сэ ля ві. То-бок b2b. У роднай мове таксама можна быць таемным госцем.
У менчукоў ва ўзросце Данііла Грыдзіна маіх праблем, ясная рэч, няма. У мове яны як дома. Ідуць сабе міма той білбордзіны, лідагенеруюць. Чэрці барадатыя…
Гэта ўсё таму, што наша менская моладзь выхаваная правільна. У духу канфуцыянства. Здаецца, менавіта Канфуцый казаў пра тое, што, каб жыць добра, трэба ўсё навокал правільна назваць.
Вуліцу Куйбышава – вуліцай Быкава. Міністэрства культуры – х**чачнай, і наадварот. Заводскі цэх – «Корпусам 8». Гультая – фрылансерам. Бледны недапечаны бяляш – фаст-фудам. Генадзеўну з вядром і анучай – клінеркай. Савецкага графамана – класікам. Кастрычніцкую – вуліцай Бразіл. Краіну – Беларуссю, а не Белоруссіей ці Вайсрусляндам. І гэтак далей. І будзе ўсім шчасце. Так казаў Лао Цзы.
Нядаўна я выступаў у Гомелі, у тайм-клубе «Флэт» (дарэчы, горача рэкамендую ўсім гамельчукам і гасцям горада). І гадзіну жыцця змарнаваў на тое, каб зразумець, у чым адрозненне тайм-клуба ад антыкавярні. Высветлілася, што ніякага адрознення няма.
А слова ёсць.
Не падумайце, што я такі ўжо пурыст. Проста ў беларускай мове слова «ўжо» кепска спалучаецца са словамі, што пачынаюцца на «п». А калі сур’ёзна… У які ўсё ж час мы жывем… Амаль старазапаветны. Час суцэльнага называння. Рэчы навокал так і прагнуць новых словаў. Антыкавярня. Прастора. Тайм-клуб. Ды каб вы ўнылі са сваімі антыкавярнямі, антыхрысты. Прасторы ім, бачыце, мала. Не старому яшчэ чалавеку ў росквіце сілаў (кшталту мяне) усё лета 2016-га даводзілася разбірацца, што ўсё гэта значыць. А калі б на маім месцы быў пенсіянер? Або ветэран вайны? Ці шматдзетная маці?
Добра, з антыкавярняй усё яшчэ больш-менш зразумела. Хоць я хутчэй назваў бы антыкавярняй якое-небудзь кафэ «На пасашок». Трэба з гэтым нешта рабіць. Быць смелым і рашучым, як Данііл Грыдзін. Або спыніцца, або ўсяму даць новыя назвы.
Ранняя беларуская антывосень так і просіцца зрабіцца першай ахвярай.
Даўно пара перайменаваць нашыя мілагучныя і ўнікальныя назвы месяцаў. На яшчэ больш мілагучныя і ўнікальныя.
Верасень выдаўся шэры, халодны, зябкі. Падмануў чаканні, як ілжывы падасінавік наіўнага грыбніка. Выбары былі… Сонца не было… Рубель падае… Вось і імя яму: хлусень. Паспрабуй адцурайся.
Ну які ў 2016-м «кастрычнік»? Які лістапад, калі ў лістападзе ўсе дрэвы голыя стаяць… Трэба назваць іх правільна. А як менавіта – хай маладыя думаюць. Ім жыць у гэтай краіне. З яе дэпрэсіямі. І яе доўгай восенню.
Яна ўжо тут.
«Гадзіну жыцця змарнаваў на тое, каб зразумець, у чым адрозненне тайм-клуба ад антыкавярні. Высветлілася, што ніякага адрознення няма»
Няхай піўніца каля Камароўкі і далей пераконвае нас, што «лето, сонца і жара – для піва самая пора», усё гэта падман. Яна ўжо тут – як слова, якое яшчэ нічога не значыць, але ўжо існуе. Тут.
У складках старых паліто на вешалках ярка асветленых сэканд-хэндаў.
У старэчым мармытанні аўтобусаў, у якіх нарэшце можна не толькі памерці ад задухі, але і пагрэцца.
У ліпеньскім загары, які пачаў пакрысе змывацца. У шапках, шкарпэтках і шуме лісця пад коламі ровара.
У вокнах кавярняў, дзе мы будзем зімаваць.
Зімаваць, зімаваць, лета чакаць. Ды марыць.
Альгерд Бахарэвіч у новым серыяле для 34mag пачынае разбіраць на часткі менскае лета-2016 і пакаленне тых, хто будзе напаўняць яго жыццём.
«Свабода і няволя бягуць у адным натоўпе, судакранаючыся лакцямі». Альгерд Бахарэвіч назірае за тымі, хто бяжыць менскі паўмарафон.
«У траўні па Менску трэба гуляць пехатой». Альгерд Бахарэвіч – пра тое, як горад пачынае любіць сябе і нават адчуваць задавальненне.
«Добры дзень, мяне завуць Альгерд Бахарэвіч, і я вегетарыянец». Працяг аўтарскай рубрыкі «Таемны госць».
A story about (or no) cooperation between government representatives, NGOs and ordinary people that care.
A story about (or no) cooperation between government representatives, NGOs and ordinary people that care.
Javid Nabiyev speaks on arrests of gay people in Azerbaijan, explains the «fucking solidarity» term and the point of activism.
Joris Hanse, Dutch activist from the Doorbraak, speaks about the Netherlands not matching the stereotypes.
COMMENTS (3)
О потерянных поколениях. http://streithahn.livejournal. com/79250.html
Нейкiя енкi старпёра.
Фота спадабалiся. Дзякуй, Паласатка!