Жан Клод Манэ

Карціны памерам з плошчу

Сёння мы вырашылі зрабіць дабро і дапамагчы беларускім хікікаморы, чый свет абмяжоўваецца квадратнымі метрамі пакоя і дзюймамі манітора. Калі спаталяць грошавы, страўнікавы і сексуальны голад людзі навучыліся даволі лёгка, то з культурнай прагай усё яшчэ могуць узнікнуць праблемы. Пагадзіцеся, седзячы на дупе даволі цяжка дакрануцца да класічных шэдэўраў сусветнага мастацтва. Але магчыма. Мы раскажам, як, не выходзячы з он-лайну, трапіць у знакамітыя музеі і пазаціраць вачыма найлепшыя творы сусветнага жывапісу.

Старыя майстры

Невядомыя італьянскія энтузіясты займаюцца тым, што фотаюць і аблічбоўваюць у неверагодна вялікім разрозненні творы мастацтва. Тут ёсць панарама сабора святога Гаўдэнзіё, Турынская плашчаніца і галоўны цуд – дзесяць карцін вялікіх італьянцаў (Батычэллі, Леанарда, Джота ды іншых) у памеры 14 на 16 метраў!

Франчэска Паоло Мікецці "La Figlia di Iorio"

Манэ

Нават калі б там не было Манэ, сайт усё роўна быў бы найлепшым. Узяць хаця б інтэрактыўны трып у раздзеле Journey. Вандруючы па працах мастака, можна іх перамалёўваць, круціць млыны, дзьмучы ў мікрафон камп'ютара, і кіраваць цягніком. Сама ж галерэя знаходзіцца тут.
Глядзець яе можна ў некалькіх рэжымах і, вядома, у вельмі добрай якасці. Праўда, перад паходам у гэты віртуальны музей раім займець анлім.

Клод Мане "La pointe de la Hève à marée basse"

Эрмітаж

У піцерскім музеі каля пяці тысяч карцін – і ўсе яны ёсць на гэтым рэсурсе, які ў сто разоў больш удалы, чым афіцыйны сайт. Але самае цікавае – сотня рэпрадукцый вагою па некалькі дзесяткаў мегабайт.  А гэта значыць, што раздрукаваць іх у шыкоўнай якасці можна будзе амаль на ўсю сцяну. Прычым сабраныя ў гэтым раздзеле самыя лепшыя палотны.

Шчадроўскі "Уличный разносчик пирогов и извозчик"

Луўр

Віртуальны музей французы зрабілі ў стылі 3D-квэсту. У рэжыме ад першай асобы можна падыходзіць да карцін і атрымліваць інфу пра тое, што бачыш. На жаль, па такой тэхналогіі працуюць пакуль толькі тры залы і копцкая капліца.

Сіксцінская капэла

Здаравенная, з такім жа вялікім маштабаваннем, панарама з сярэдзіны ватыканскай капэлы.

Яшчэ некалькі добрых калекцый:

artrenewal.org  225 метраў жывапісу.

wga.hu  25 тысяч карцін, знакамітых і не вельмі.

passionforpaintings.com  10 тысяч мастакоў і 300 тысяч карцін. Што яшчэ скажаш?

artsait.ru  Шэсць соцень рускіх мастакоў з усіх эпох.