Уладзімір Навіцкі

За іх плячыма – доўгае і насычанае жыццё. Надышоў час дзяліцца сваім досведам з маладым пакаленнем. У новай рубрыцы Old School мы будзем сустракацца з мастадонтамі айчыннай медыя-прасторы, каб узяць на аловак колькі парадаў з самых розных сфераў жыцця. Ці актуальны яны ў сучаснай рэальнасці – вырашаць табе. Першым будзе спартовы каментатар Уладзімір Навіцкі.

  Запальчывасць, залішняя эмацыйнасць, марнатраўнасць, часам – адсутнасць логікі. Гэта тое, што ты можаш прыняць у жанчыне, але чаго зусім не хацелася б бачыць у мужчыне.

  Подласць, здрадніцтва, непрыстойнасць. Тры рэчы, якія прабачаць нельга.

  Сямейную здраду можна дараваць. Ёсць тысяча і адна акалічнасць, і фізічная здрада не заўсёды падобная да здрады духоўнай. У жыцці ўсякае бывае, і я не прыхільнік таго, што здрадзіў – і ўсё, ніколі разам больш быць нельга.

  Сакрэт сямейнага дабрабыту – агульныя інтарэсы.

  Будзь акуратным у ацэнках. Не прымаю і не разумею, калі ацэнку калегам даюць каментатары. Ёсць заўзятары, якія нас ацэньваюць.

  Ты ўвесь час мусіш быць чымсьці зацікаўлены.

  У спартовую журналістыку трэба ісці людзям з энергетыкай, з добразычлівым стаўленнем да іншых. Важна, каб у цябе было жаданне пастаянна павялічваць свой слоўнікавы запас.

  Калі дрэнны настрой, з'еш шакаладку.

  Перад цяжкім кавалкам працы трэ абавязкова адпачыць. Я перад рэпартажам, калі атрымліваецца, імкнуся паспаць гадзіну-другую.

  Калі трэба падняць тонус, дапамагае цёплая ванна і кубак кавы.

  Вучыся сумяшчаць любімую працу і сямейнае жыццё. Я вось шкадую, што недастаткова займаўся выхаваннем сына.

  Кожны сталее ў свой час. Ты адчуеш гэта, калі вецер перастане ў галаве гуляць. У мяне гэта здарылася на апошніх курсах інстытута, гады ў 22–23. Калі паехаў на ваенныя зборы.

  Галоўная задача бацькоў – умець адказаць на пытанне, што такое добра і што такое дрэнна. Атрымліваецца гэта не заўсёды і не ва ўсіх. Будзь да гэтага гатовы.

  У мяне бацька быў ваенны, шмат жылі па ваенных гарнізонах, гэта свой лад жыцця, свае парадкі. Галоўныя ўрокі бацькі: важна быць прыстойным, трэба абараняць слабых, а калі хтосьці лаецца матам у прысутнасці дзяцей і жанчын, трэба ставіць яго на месца.

  Памятай, пражытыя разам гады збліжаюць.

  Пражыві жыццё так, каб у цябе самога было адчуванне, што ты пражыў жыццё як прыстойны чалавек, што ты не рабіў подласці

  Ты не ледзянец, усім падабацца не можаш.

  У Беларусі варта ганарыцца «Песнярамі».

  Я па натуры залішне сентыментальны чалавек. І часам, калі бачу нешта такое ў кіно, не магу стрымаць эмоцый. Думаю, што такіх натуральных, нармальных пачуццяў саромецца не трэба.

  Ёсць адзін заўзятар, які пасля кожнага рэпартажу, у якім гучыць слова «корнер», піша начальству скаргу на мяне. І мяне прымушаюць даваць адказ, што гэта не таму, што я супраць рускай мовы, а таму, што хачу выкарыстоўваць сінонімы. Корнер – нармальнае слова. Трэба гнуць сваю лінію.

  Даваць парады варта толькі тады, калі пра гэта сапраўды просяць. Мне не падабаецца роля ментара. І вельмі непрыемна, калі бачу, што нехта спрабуе павучаць.