Стакгольмскі сіндром

На ежу ў Швецыі можна патраціць усе свае ашчаджэнні або спужацца коштаў і не есці ўвогуле. Мы прапаноўваем згадаць, што ты ў Скандынавіі, а Швецыя – гэта яшчэ бюджэтны варыянт у параўнанні з Нарвегіяй. Таму – не застаемся галоднымі, а шукаем кафэхі, дзе харчуецца мясцовае насельніцтва. 

Back A Yard – калі вы яшчэ ніколі не былі ў ямайскай рэстарацыі – зазірніце сюды. Кошты не кусачыя, а адзін выгляд повара варты таго, каб вам захацелася там паесці. Folkungagatan, 128.

Mosebacke, Södra Teatern – абяцае фантастычны выгляд на горад і самую розную музыку: soul, electronic funk, hip-hop, jungle, house, electro і disco. Södra Teatern, Södermalm.

Bauer – кафэ-бар, які нагадае вам атмасферай бар «Малако», толькі разоў у 10 большы. Гэта яшчэ і месца, дзе можна пакаштаваць цёмнага разліўнога піва «Brooklyn». Добрая музыка, шмат людзей і месца, Wi-Fi, а таксама шкляныя сцены з боку вуліцы, якія прыбіраюцца на дзень. Дызайн бара стваралі «Dizel & Sat», якія працавалі з «Diesel», «Filippa K» і «Hugo Boss».  Götgatan, 15.

Urban Deli – для фанатаў добра вырашчанай і прыгожа прыгатаванай ежы. Прадуктовая крама + кафэ два ў адным. Ежа і дызайн пакункаў для яе выглядае так, што без нічога вы адтуль не выйдзеце. Nytorget, 4.

Louie-Louie – рок-кафэ, музычная крама і крама адзення. Усё ў стылі 50-х. Шведы – вялікія фанаты рокабілі. Bondegatan, 13.

Hermans – вегетарыянскі буфет + абяцаюць цудоўны выгляд на горад. Fjällgatan, 23b.

Bakverket – знакаміты тым, што сняданне тут падаюць цэлы дзень. Калі вы слаба памятаеце, як правялі мінулую ноч, – вам сюды. Bondegatan, 59.

Kafé 44 – Гэта тры альтэрнатыўныя групы, якія працуюць пад адным дахам. Bokhandeln INFO – анархісцкая кніжная крама; Dagfiket – кафэ; Scen 44-клубная частка, дзе адбываюцца канцэрты. Tjärhovsgatan, 46.

Coffice – месца, дзе можна сустрэць шмат мясцовых фрылансераў. Кафэ+офіс. Tjärhovsgatan, 5.

Debaser – галоўнае музычнае месца ў Стакгольме, якое памятае ў сваіх сценах Боба Дылана. Slussen, Karl Johans Torg, 1.

Skåningen – кафэ, якое таксама адносіць у 50-я. Класічныя шведскія сэндвічы і недарагая кава. Skånegatan 92

Muggen – проста традыцыйная кавярня з добрай ежай, віном і Wi-Fi. Götgatan, 24.

Wayne's Coffee – мясцовая сетка кавярняў, якая працуе па прынцыпе «Starbucks». Можна знайсці на самых ажыўленых вуліцах, як, напрыклад, Götgatan. Кава класічнага смаку ў памяшканні і на вынас.

Cafe String – папулярнае кафэ ў SoFO. Інтэр’ер з 50-х, дзе ўсе рэчы прадаюцца. Nytorgsgatan, 38.

TuliY’s Coffee – зноў сэндвічы і кава. Выдатны перакус з ранку да вечара з выглядам на ажыўленую пешаходную вуліцу. Götgatan, 42.

Muggen – проста традыцыйная кавярня з добрай ежай, віном і Wi-Fi. Götgatan, 24.

Thai House Wok – тайская ежа. Магчыма, найлепшая ў Стакгольме, на Folkungagatan, 108 і яшчэ некалькі ў акрузе. Сюды заходзяць як паесці на месцы, так і ўзяць пакунак ежы на сям’ю, калі лянота гатаваць пасля працы. Атмасфера часам занадта хатняя, і «сэрвісам» у беларускім сэнсе назваць кафэху немагчыма, як і любую сапраўдную тайскую. Але тут ты атрымаеш паўкілі неверагодна смачнай ежы і абавязкова захочаш, каб тайцы адкрылі тое самае ў тваім раёне ў Менску.

Турэцкая ежа. Калі ты ўсё-ткі выбраўся ў цэнтр – там цябе акрамя стандартнай «Pizza Hut», у якую мала хто зазірае, можа парадаваць турэцкая ежа. На месцы або на вынас. Калі складанасці з ангельскай – цалкам імаверна, што цябе тут зразумеюць на роднай мове. Шукаць ежу на Grytgjutargången.

Увага! Не забывайцеся, вы ў сацыялістычным раі. «Адчэпных» тут не патрабуюць, а ў большасці месцаў замаўляеш усё сам на бары – афіцыянты толькі прыносяць вам з кухні ежу і забіраюць талеркі.

«H&M» у Стакгольме не знойдзе хіба сляпы, таму засяродзімся на крамах, дзе прадаюць тое, чаго ў бліжэйшым замежжы не ўбачыш.

Fröken söt – маленькая крама для дзяўчат. Сукенкі і яшчэ раз сукенкі з прыгожых тканінаў у стылі рэтра. Götgatan, 9.

Monki – марка, якая карыстаецца шалёнай папулярнасцю ў мясцовых дзяўчат. Фірмовыя шведскія балахоны, шорты і сукенкі знойдзеш тут: Sergelgatan, 16-18, Götgatan, 19, Götgatan. 78, Byholmsgången, 1-3.

Weekday – моднае адзенне + сэканд. Натуральныя тканіны і цікавы пакрой для хлопчыкаў, дзяўчатак і андрагінаў. Тут жа знойдзеш адзенне ад «Cheap Monday». Götgatan, 21, Olofsgatan, 1, Drottninggatan, 63.

Tjallamalla – некаторыя лічаць, што гэта найлепшая крама ў свеце. Пераважна шведскае дызайнерскае адзенне па разумных коштах + цікавая публіка. Bondegatan, 46.

Urban Outfitters – узгадайце проста сцэну з любога моладзевага фільма, дзе маладыя героі забягаюць у лонданскую краму і мераюць касмічна прыгожыя рэчы, а табе хочацца набыць іх усе. Усё, што цікава актыўнай моладзі, – ад адзення да дызайнерскіх кніжак і лома-камер. Biblioteksgatan, 5.

DesignTorget – крама з дызайнерскімі карыснымі штукамі для дома, дзе хочацца набыць проста ўсё.  Götgatan, 31, Västerlånggtan, 56, Sergelgången, 29, Kungsgatan, 52, Nybrogatan, 16, Götgatan, 132, St Eriksgatan. 45.

Tiny Masters – дызайнерскія ўпрыгожванні.  Grindgatan, 29.

Coctail – кажуць, гэтая крама падобная на пекла кітчу. Пластыкавыя дробязі, цацкі самых дзіўных форм і прызначэнняў. Калі вы раптам настальгуеце па савецкім мінулым і сваіх цацках з дзіцячага садка. Skånegatan, 71.

Lisa Larsson – вінтажныя і новыя рэчы ўперамешку. Boindegatan, 48.

Sko Uno – рэдкі і вінтажны абутак усіх магчымых і немагчымых марак + дэмакратычныя кошты. Gamla brogatan, 34.

Butik Under – вінтажнае дзіцячае адзенне. Tjärhovsgatan, 19.

Блышыны рынак – праходзіць па выходных на плошчы Hötorget перад універмагам PUB.

Papercut – самая класічная невялікая крама з фільмамі, кнігамі і часопісамі. Krukmakargatan, 24.

Konst-ig – заяўляюць сябе як найлепшая кніжная крама, што тычыцца выданняў па мастацтве. Åsögatan, 124.

Comics Heaven - маленькая па памеры, але з вялізным выбарам крама коміксаў з усіх магчымых краін. Ад класічных амерыканскіх да старых польскіх. Stora Nygatan 23

Götgatan 31 – крама з разнастайнаю перыёдыкай на розных мовах. Знайсці новы «Monocle» або «I-D» тут прасцей за ўсё. Мае прыемнае суседства з кафэ «Wayne's» і крамай «DesignTorget».

Галіна абмеркавання лоўкостаў на onliner

Wizzair:

46 злотых каштуе квіток на самалет Wizzair з варшавы на 6, 8, 13, 15, 16, 22, 23, 29 і 30 верасня

З Кіева такі ж накірунак абыйдзецца у 238 грывен 5.09, а па астатніх панядзелках і пятніцах верасня квіток будзе каштаваць 318 грывен

Ryanair:

Ryanair лётае ў Стакгольм з Каунаса. Каштуе гэта 24 літаў у адзін бок на 9, 11, 18, 20, 23 і 25 жніўня.

Але трэба разумець, што лоукосты лётаюць у аэрапорт, аддалены ад цэнтра горада, таму да самаго Стакгольма яшчэ трэба будзе дабрацца. Прасцей за ўсё зрабіць гэта на спецыяльным аўтобусе, квіток на які будзе каштаваць
129 крон (каля 11 еўра).

Транспарт Стакгольма:

Метро (T-Bahn) - 3 лініі, больш за 100 станцый. Працуе з 5.00 да 24.00.

Цэнтральная станцыя Т-Centralen.

Тут можна знайсці кошты на квіткі для метро і аўтобусаў. У сярэднім - 30 крон на адну паездку.

Афіцыйны гайд па Стакгольме