Jump-shoot

Ідэя сабраць на адным DVD штосьці накшталт улюбёнага ютубаўскага рок-фармату ў выкананні сяброў прыйшла ў галаву Пашы, лідару гурта Sub Rosa Dictum.

«Ніякай двіжухі няма, ніхто нічога не робіць, самотна,– успамінае Паша. – Захацелася добрага канцэрта, але каб ён быў нечым падмацаваны. Тут і ўзнікла ідэя здзейсніць нешта незвычайнае. Мы сабраліся на студыі, дзе раней рэпетавалі, і зладзілі такі музычны спектакль, амаль па Станіслаўскаму».

Выйшла даволі цікавая падборка live-сэтаў, з дастаткова бадзёрым гукам у лёгкай амерыканска-флэтавай манеры. Праект атрымаў назву «JUMP!». У эксперыменце ўзялі ўдзел чатыры маладыя менскія банды: Avias, 2morrow2late, Straightroads і Sub Rosa Dictum. Адметна, што праект адбыўся абсалютна без грашовай падтрымкі.

«Задума была ў тым, каб сабраць цікавыя гурты-аднагодкі, – распавядае Паша. – Каб былі нечым падобныя адзін да аднаго, але гучалі па- рознаму. А таксама хацелася зрабіць гэта бясплатна, патраціць толькі свой час. Таму здымалі на сяброўскай студыі, адразу цэлымі пачкамі, сэт за сэтам. Па знаёмых назбіралі ажно пяць фоцікаў. Здымкі і постпрадакшн узялі два месяцы».

На 16-га лютага музыкі запланавалі таксама дармовы канцэрт ў падтрымку DVD у Re:public. Пракачае гэты праект ці не, будзе бачна пазней. Але просты і танны падыход музыкаў да праблемы «як быць пачутымі» і жаданне не сядзець на месцы, на наш погляд, заслугоўвае павагі.

Sub Rosa Dictum

Менскі гурт, заснаваны ў сярэдзіне 2010-га. Стыль, у які пакуль усё выцякае, – «альтэрнатыўны погляд на гранж-музыку» і толькі old school. У цяперашні момант гурт трымаецца палітыкі – выступаць радзей, але на вартых пляцоўках. Улетку 2011 выпусціў Big EP, зараз працуе над новым поўнафарматным альбомам.

  LAST.FM | ВКОНТАКТЕ

Avias

Гурт сабраўся ўлетку 2010-га. Музыкі абралі для сябе сумленны агрэсіўны рок, які ідзе каранямі ў сіэтлаўскую сцэну пачатку 90-х мінулага стагоддзя. На дадзены момант калектыў можа пахваліцца парай дзесяткаў канцэртаў і фэстэвальных выступаў у Беларусі, Расеі і Польшчы. Увесну 2011-га выпусціў дэбютны ЕР «Маяк», цяпер заняты працай над наступным студыйным рэлізам.

  AVIAS.BY | LAST.FM | ВКОНТАКТЕ

2morrow2late

Гурт утварыўся напрыканцы 2009-га. Музыка 2morrow2late – гэта шчыры, качовы рок у духу 90-х, без гожанькіх мелодый і вылізаных запісаў. За час свайго існавання музыкі адыгралі некалькі дзесяткаў канцэртаў, выпусцілі тры інтэрнэт-сінглы і ў сакавіку гэтага года плануюць прадставіць свой студыйны альбом Songs That Make You Happy.

  2MORROW2LATE.COM | LAST.FM | ВКОНТАКТЕ

Straightroads

Гурт узнік у лютым 2010-га. Хлопцы імкнуцца не трымацца нейкага пэўнага стылю і заўсёды гатовыя эксперыментаваць у межах прыстойнасці. На дадзены момант ужо маюць поўнавартасны канцэртны сэт і даводзяць да розуму першы альбом.