Esthetic education

«NewTon» – гэта тры нішцякі ў адным: крама з дызайнерскімі шмоткамі, арт-галерэя і буфет. Проста сярод залы стаяць вешалкі з вопраткай ад беларускіх дызайнераў, на паліцах раскладзена біжутэрыя, і ўсё гэта можна падабраць з дапамогай мясцовага стыліста і начапіць на сябе ў прымерачных. Арт-галерэя распаўзлася па сценах і вабіць патраціцца на творы маладых беларусаў, якіх вышуквалі па архівах Музея сучаснага мастацтва і творчых факультэтаў. Дарэчы, усё гэта створана з мэтай прасоўвання ленаватых да самапіяру айчынных творцаў. Кожны з іх можа прынесці і паспрабаваць прадаць плады свайго таленту.

Адэптам алкапаці і тусарам з «Графіці» раім не праходзіць міма фірмовай крамы «Крышталя», што месціцца побач, бо спірту ў буфеце няма ні градуса. Хіба толькі ў двух эксклюзіўных кававых напоях. Паліць таксама забаронена паўсюль, акрамя вулічнай тэрасы. Унутры ж, дзе сядуць максімум 25 чалавек, нішто не павінна парушаць медытатыўнасці спажывання шырокай кававай і гарбатнай карты.

«NewTon» запісаўся ў сябры Еўрапейскай асацыяцыі кавы, а сумесі для месца выбірае адзін з найбольш прашараных барыстаў краіны Віталь Фільмановіч. Ён жа вынайшаў для буфета сакрэтныя кававыя напоі «№ 1» і «№ 2». За гарбатай таксама сочыць асобны спецыяліст; яе тут поўны спектр – ад белай да пуэраў. Кошты на ўсё абяцаюць ніжэй за сярэднеменскія. На закуску падаюць вяршковыя круасаны, штрудэлі, чызкейк і хэнд-мэйд цукеркі.

Тая самая павольнасць будзе і ў івэнтах: мінімум руху – максімум вытанчанасці. Што аўторак і чацвер – жывы джаз і блюз галасамі кансерваторыі, што сераду і пятніцу – cinema time. Па чарзе будуць круціць расейска-савецкае і арт-хаўзнае кіно. На жнівень запланаваныя Кіра Муратава і Кім Кі Дук. Падчас вечарын ні табе дзікіх танцаў пад драм, ні п’янага ляманту рокераў – лаўнж з дзіджэйскага пульта будзе руліць тваім пульсам.

Буфет жыве па сваім календары, замешаным на грыгарыянскім ды індзейцаў мая. Увесь год тут разбіты на «times» даўжынёю месяц. Кожнаму прысвячаецца слоган, спецыяльны кававы напой і тэматычныя тусы. На наш жнівень прыпадае мясцовы «NewTon Time» пад сакральным лозунгам «Любіш мяне – любі і майго сабаку». Дарэчы, агульны дэвіз месца – «Для тых, хто любіць».

Заснавальнікі бачаць сваёй місіяй вучыць менчукоў добраму густу, распаўсюджваць культуру кавы і гарбаты ды піярыць маладыя таленты. Таму штотыдзень тут чакаюцца адукацыйныя семінары. А таксама – гарбатныя цырымоніі з заяўленай тэмай дыскусіі ды цікавым госцем, гарбатны жаночы клуб «Women time» і ўрокі займальнай фізікі з запрошанымі ўніверскімі прафесарамі.

Гікі і юзеры зніжкавых сайтаў у захапленні: разетак панатыкана больш, чым крэслаў, а вайфай-трафік льецца дарам. Побач з тэрасай – паркінг для вадзіл і раварыстаў. На сайце буфета nfab.by можна знайсці расклад усіх «таймаў», паказаў, выставаў і семінараў, а таксама вялікую калекцыю арт-тавараў. Працуе «NewTon» з 10:00 да 22:00 і пакуль што ў тэставым рэжыме. Афіцыйнае адкрыццё па прыглосах пройдзе 13 жніўня а 13:00.

Photo by Victor Hilitski