Быць Барбі

«Яны пытаюцца ў мяне, як я раблю эпіляцыю бікіні, якой фарбай для валасоў карыстаюся»

Бландзінка Каця Коба не ябашыць хіпстарскіх лукаў, не вешае на віртуальную сцяну катэ і статусы пра пятніцу-пітніцу. Самая распаўсюджаная сацыяльная сетка «ВКонтакте» абажае яе за падборкі здымкаў з мужам на Мальдывах і цытаты, скопіпашчаныя з сайтаў а-ля «прыкольныя статусы для “кантакта”». Што не пост – то новы рэкорд: каля тысячы лайкаў і столькі ж каментарыяў. Асобнай увагай шаноўнай публікі карыстаюцца ролікі на YouTube, дзе Каценька таньчыць каля фіранак або дастае суніцы з аўто.

«Мая вядомасць “ВКонтакте” і ўвогуле ў інтэрнэце – гэта загадка для ўсіх, у тым ліку для мяне, – разважае прыгажуня. – Я зарэгістравалася ў сетцы тры гады таму. Мае фатаграфіі пачалі капіраваць у групы накшталт “Прыгожыя людзі”. Так усё і пачалося. У мяне мала фрэндоў – усяго тысяча. І альбомаў толькі дзевяць. Гэта зусім мала. Але ж я ў закладках у 100 тысяч чалавек. Статусы пішу гады ў рады. Мой пост “Калі клапоцішся пра прыгажосць, пачні з сэрца” атрымаў 2 тысячы лайкаў. Увогуле мне здаецца, якую лухту ні напішы – атрымаеш вагон плюсаў». 

Адваротная старонка асоб-мемаў, лічыць Каця Коба, плёткі і зайздрасць. На яе профілі вісіць каля 9 тысяч неадказаных лістоў. Кампліменты, прапановы рукі і сэрца (дарэчы, Каця – замужняя дама), пагрозы і пытанні, ад філасофскіх да бытавых: як знайсці багатага кавалера?

«Я не магу зразумець, што ў галовах некаторых дзяўчат, – здзіўляецца Каця. – Яны пытаюцца ў мяне, як я раблю эпіляцыю бікіні, якой фарбай для валасоў карыстаюся. Як можна не разбірацца ў такіх рэчах?! На мой сайт прыходзяць ананімныя лісты, дзе пішуць, быццам я шантажавала свайго мужа Віталіка дзіцёнкам, каб толькі ён пабраўся са мной шлюбам».

«Усё ж такі мне ўжо 23 гады, я жонка і маці – трэба быць сур’ёзнейшаю»

Паводле Каценькі, сайт Barbie.by – гэта справа рук яе мужа Віталя. Ён прыдумаў жонцы бяспройгрышную ралявую мадэль, якая і праславіла яе на вялікую частку рунэта. Віталь сам загружае фотаздымкі і відэаролікі жонкі на сайт.

«З часам я хачу адысці ад вобраза лялькі, – гаворыць Барбі. – Пафарбавала валасы ў болей цёмны колер. Усё ж такі мне ўжо 23 гады, я жонка і маці – трэба быць сур’ёзнейшаю. Я замужам ужо 4 гады. У нас ёсць сынок Цімур, яму тры. З Віталікам мы пазнаёміліся, калі я вучылася ў адзінаццатым класе. Чакала аўтобус на прыпынку, і раптам ён пад’ехаў, каб пазнаёміцца».

Пра свае ператварэнне са звычайнай школьніцы ў прынцэсу байнэту Каця распавядае даволі эмацыйна: «Ніякіх грошай у нас не было. Я расла без бацькі, мой муж таксама. Жылі вельмі сціпла. Я была сімпатычнай дзяўчынкай, калі вучылася ў школе, але не разумела гэтага. Муж заўсёды казаў, што я самая прыгожая, самая лепшая. Дзякуючы яму, я зрабілася ўпэўненай у сябе, болей сексуальнай. Віталік сфармаваў мой светапогляд. Калі я расказваю сябрам, які бізнес у майго каханага і якія ролікі ён выкладае ў інтэрнэт, у іх вочы робяцца па пяць капеек. Вось якое каханне!»

Першую палову дня Каця здабывае дыплом у інстытуце па спецыяльнасці «кіраванне прадпрыемствам». З Цімурам сядзіць бабуля. Пасля абеду самая знакамітая бландзінка байнэту прысвячае сябе дому і сям’і.

«Калі б я была згодная з ідэямі кандыдата, я б падтрымала яго на сваёй старонцы»

Свайго саперніка па фэйках і тролінгах – Бажэственнага Зураба – Каця асабіста не ведае. Гаворыць, што ў гламурнай сталічнай тусоўцы з героя часопіса «Пінгвін» смяюцца. Тым не менш, на вокладцы глянцавага выдання Каця апынуцца не супраць.

«Тры тысячы даляраў – і ты на першай паласе! – раскрывае таямніцы айчыннай журналістыкі Коба. – Яшчэ я хацела б удзельнічаць у якімсьці рэаліці-шоу, толькі не “Дом-2”. Муж забараняе мне глядзець гэтую праграму. Яна амаральная. Непрыемна назіраць, як людзі паліваюць адзін аднаго брудам. Мне прапанавалі зрабіцца тварам маскоўскай кампаніі. Якой – пакуль сакрэт. Што датычыцца палітыкі, то гэта вельмі незразумела. Складанае пытанне. З нашай палітычнай сістэмай любы разумны чалавек не будзе згодны, але не трэба гэта выказваць публічна, апазіцыя – гэта небяспечна. Калі б я была згодна з ідэямі кандыдата, я б падтрымала яго на сваёй старонцы. Пакуль жа я здымаюся ў якасці мадэлі для рэкламы і кліпаў».

Пра гламурную тусоўку сталіцы Каця кажа з усмешкай. Маўляў, адзенне ў большасці заўсёднікаў безгустоўнае, і ўвогуле без мужа «ў свет» яна выходзіць рэдка. З незнаёмымі мужчынамі не размаўляе ніколі. Калі хтосьці адрасуе прыгажуні камплімент, максімум, што ён можа атрымаць у адказ – гэта сціплае «дзякуй». Нягледзячы на прыгажосць і шум вакол асобы жонкі, муж Віталь яе не раўнуе. Каця ўпэўненая, што адносіны ў іх сям’і будуюцца на даверы.

Гледзячы на мілы тварык і слухаючы Каціны гісторыі, атрымліваеш уражанне, што ніякіх праблем у Кацярыны няма. Высвятляецца, што не ўсё так бясхмарна. «Усе людзі носяць маскі, – кажа Каця. – «ВКонтакте» ўсё павярхоўна. У мяне, як і ў любой сусветнай зоркі – каго ні вазьмі – ёсць падводныя камяні ў жыцці».

САЙТ КАЦЕНЬКІ КОБЫ  - BARBIE.BY
      СТАРОНКА КАЦЕНЬКІ "ВКОНТАКТЕ"