topic!

Згадайце школьны падручнік па гісторыі. Таму што вяртаюцца часы натуральнага абмену.

Паныла. Восень. Хочаш быць яркім у новым палітоне ці штанцах? А па кішэнях гуляюць суворыя вятры? У сэкандзе завоз быў на тым тыдні і ўсё прыстойненькае даўно разьмялі?
А вось у Танькі палітон зачотны, а ў Сьветкі штанцы якраз твайго памеру, ёй жа трахец завялікія.

Што рабіць?
Тэрмінова спускаць апошнія грошы з мабілкі, каб патэлефанаваць Таньцы ды Сьветцы і дамовіцца на сустрэчу. Нагода? SWISHING!

Неглыбокія карані
Яго прыдумала ў 2000 годзе спадарыня Люсі Шы. Банальна, каб аб’яднаць любоў да новага і нежаданьне павялічваць выдаткі. А пасьля таго як пра гэта распавялі па BBC, swishing зрабіўся папулярны. Чаму не? “Не спускай грошы, ратуй плянэту, весяліся!” - як тут не далучыцца?

Што за?..
Выдатная магчымасьць сустрэцца зь сябрамі, пабалакаць пра жыцьцё і пры гэтым абнавіць гардэробчык.
Раз. Абіраеце месца і цягнеце ўсё тое, чым гатовыя дзяліцца зь сябрам. Цягнем толькі чысьценькае і “прылічнае”.
Два. Дасьведчаныя свішэры раюць на сустрэчу ўзяць белага вінца ды сыр. Кажуць, так лепш ідзе працэс.
Тры. Залатое правіла: не зьбірацца менш за тры. Так-так. Калі нас шмат – мы сіла. Альбо, калі ты прынесла дзьве спаднічкі, вынесьці можаш колькі заўгодна.

Экспэрымэнт

Сяброўкі Ксюша і Воля пагадзіліся на swishing-экспэрымэнт. Трэці чалавек быў, здымаў працэс.

Гэтым разам было вырашана ня проста памяняцца шалікам да пальчаткамі, а замахнуцца на кардынальны абмен.

Атрымалася нечакана. Вынікамі сяброўкі, у прынцыпе, засталіся задаволеныя. Адна так бы і хадзіла, другой у такім толькі патусіць.

Дзяўчаты  зусім ня супраць правесьці swishing party ужо без падглядваньня.

Такім чынам, па выніках першай вечарынкі:

Чаму  “Так”?
Таму што арыгінальна, весела, нечакана, танна і аб’ядноўвае.

Каму “Не”?
Няблізкім людзям; тым, каму гардэробчык яўна не па фасоне; тым, каму не па памерах; сквапным.

Рэакцыя
Працэс не прайшоў незаўважаным. Некаторыя не маглі стрымліваць захапленьня, іншыя ўспрымалі ўсё як звычайны жарт. Самыя ж адчайныя пагаджаліся на падобнае ўжо са сваім удзелам. Так што чакайма свішынг-вечарынкі! Ці муціце свае.

Swishing крочыць па плянэце!
Калі яшчэ застаюцца сумневы ў тым, што нехта так робіць – прэч іх!
- Брытанцы, мабыць, пакутуючы ад фінансавага крызісу, ужо ня ладзяць паці на хаце, а папросту мяняюцца онлайн.  
- Ня сьпяць і бэльгійцы, на першую сустрэчу прыцягнуўшы ажно 18 чалавек. Сьцьвярджаюць, што ўсе сыйшлі задаволеныя (вэрсія толькі нідэрляндзкамоўная, затое можна пазырыць здымкі).
- Асноўны сьвішынг-сайт - http://www.swishing.org
- І куды ж без сацыяльных сетак?